Ki paidbah ieid football ha pyrthei mynta ki dang ap khmih lynti ia ka jingïakhun 
kaba itynnad bha hapdeng ka Brazil bad Norway. Ka jingïakhun kaba bun ki 
ong ba ka lah ban long kawei na ki jingïalehkai kiba itynnad tam ha kane ka 
World Cup 2026. 

Watla ka Brazil ka long ka ri kaba la rah haduh 5 sien ia ka World Cup, hynrei 
mynta ka jingïaid lynti jong ka kam long kaba suk satia ban poi sha ka final 
namar ka hap ban jam ia ki jingeh da lah ban ia kynduh ia ka England lane 
Argentina lada jop ia ka Norway. 

Kum ban shu pyn kynmaw Ha ka Round-32 pyrshah ia ka Japan, ka Brazil da 
kaba sait ka la lah ban pyn liem ia ka Japan lyngba ka kol kaba thep  haka  minit 
kaba 95,da u Gabriel Martinelli  kaba la pyllong ia ka  Brazil bad pynrung ia ka 
sha ka Round-16. 

Kane ka pyni ba watla ka Brazil ka dang jop bun tylli ki jingïalehkai, hynrei ka 
kynhun kam pat poi sha ka kyrdan kaba bha tam jong ka naduh u snem 2002 ba 
ka jop khatduh ia ka World cup bad hadien nangta bun beit ba kut ki lynti iaid ha 
ka Round kaba 8 lait tang ha ka world cup ha u snem 2014 ba ka poi sha ka 
simifinal  kane kawei na ki bynta kaba pynsngewkhia ia ki nongkyrshan jong ka 
Brazi hynrei mynta ka don pat ka jing kyrmen hapoh ka jingia lam u Coash Carlo 
Ancelotti  . 

Hynrei kaba kham pynlyngngoh ka long ba kat kut ka histori, ka Brazil kam pat 
ju jop satia ia ka Norway. 

Ha ki 4 sien ba kine ki ar tylli ki ri ki la iakynduh, ka Brazil kam shym la jop wat 
tang shisien ruh. Ka la iakhaid arsien bad ka la rem arsien. 
Ka jingïalehkai kaba dang sah ha ka jingkynmaw jong bun ka long ha ka World 
Cup 1998, ha kaba ka Norway ka la pynliem ia ka Brazil da 2-1. Bad kaba kham 
sngewtynnad ka long ba u Coach jong ka Norway mynta, Stale Solbakken, u 
dang dei ruh u player ha kata ka kynhun kaba la pynliem ia ka Brazil. 
Mynta u Solbakken u la ong ba u burom bha ia ka Brazil, hynrei um shym la tieng 
satia. U la kren shai ba ka Norway kam wan tang ban shim bynta, hynrei ka wan 
ban jop bad ban rung sha ka Quarterfinal. 
Ha ka liang ka Brazil ruh don katto katne ki jingeh. 
U Lucas Paqueta u la mynsaw, kaba lah ban ktah ia ka midfield jong ka Brazil. 
Katba u Neymar u la koit biang, hynrei ka long kaba eh ban tip la u Coach Carlo 
Ancelotti un sdang ne em ia u rangia lehkai ha kane ka jingïalehkai. 
Ha ka liang ki nongialehkai ban peit kyrpang, ka Brazil ka dang shaniah bha ha u 
Vinicius Junior, uba la thep kol ha baroh lai tylli ki jingïalehkai group stage. U 
Bruno Guimaraes pat u dei uba la ai bun tam ki assist ha kane ka World Cup 4 
tylli. 

Hynrei ka Norway ruh ka don ia uwei u rangialehkai uba ki nongapdien jong ka 
Brazil ki dei ban husiar bha. 
 
U Haaland u la thep haduh 5 kol ha kane ka World Cup bad u long uwei na ki 
striker kiba shyrkhei tam ha pyrthei mynta. Wat lada u jah na ka jingïalehkai bun 
por, hynrei tang shisien ba u ioh lad hapoh penalty box, u lah ban pynkylla 
syndon ia ka jingïalehkai. 
Nalor kata, u Martin Odegaard ruh u dang don ha ka form kaba itynnad bha bad 
u la ai assist ha lai tylli ki jingïalehkai lynter. 
Kumta kane ka jingïakhun kam dei satia tang ka Brazil pyrshah ia ka Norway. Ka 
long ruh ka jingïakhun hapdeng ka histori bad ka jingkwah ban thaw histori 
thymmai. 
Ka Brazil ka kwah ban pynduh noh ia ka jingïathuhkhana ba kam pat ju lah ban 
jop ia ka Norway. 
Katba ka Norway pat ka kwah ban bteng ia ka record kaba khraw jong ka bad 
ban pynkyndit biang ia ka pyrthei football. 
Te, phi paidbah, phi paidbah pyrkhat kumno? 
Hato ka Brazil kan lah ban pynkut noh ia kane ka record kaba sniew bad bteng ia 
ka lynti sha ka trophy? 
Lane ka Norway kan pynmih biang ia kawei pat ka jingkyndit kaba khraw ha kane 
ka World Cup?