Ha phi ki riew ieid football, long kiba la pynkhreh ïa lade ban sakhi ïa
kawei na ki jingïalehkai kaba khraw tam ha ka Round of 16 jong ka
FIFA World Cup 2026. Ka Portugal ka la rung sha ka Round of 16
hadien ba ka la jop ïa Croatia da 2-1 kol, katba ka Spain pat ka la
pynliem ïa Austria da 3-0 kol ha ka Round of 32.

Kane ka jingïalehkai kan long ha ka 7 tarik Naitung (July) 2026 ha
ka por 12:30 AM. Lada phi kwah ban peit ïa kane ka jingïakhun kaba
khraw, kynmaw ban buh alarm ha ka phone jong phi.

Kane ka jingïalehkai ka pynkynmaw biang ïa ka World Cup 2018 ha
Russia, ha kaba Portugal bad Spain ki la ïakhaid 3-3 ha ka Group
Stage. U Cristiano Ronaldo u la thep hat-trick, bad ka free-kick jong u
ha ki minit ba khatduh ka la pynlong ïa kata ka jingïalehkai kum kawei
na kiba itynnad tam ha ka histori jong ka World Cup.

Hadien kata, ha ka UEFA Nations League, ka Spain ka la jop ïa
Portugal da 1-0 kol ha ka jingïalehkai Group Stage. Hynrei ha ka Final
jong ka UEFA Nations League, kine ki ar tylli ki ri ki la ïakhaid 2-2 bad
ka Portugal ka la jop da 5-3 ha ka penalty shootout ban rah ïa ka
trophy.

Ka Spain ka wan sha kane ka jingïalehkai da ka jingkyrmen kaba
khraw. Ka don bun ki rangïalehkai ba tbit kum u Lamine Yamal, Pedri,
Nico Williams hynrei uba la long u rangthep kol ba khlain tam jong ki

haduh mynta u dei Mikel Oyarzabal, uba la thep 4 tylli ki kol na 4
tylli ki jingïalehkai ha kane ka World Cup.

Ka Portugal pat ka dang shaniah ha u captain jong ka, u Cristiano
Ronaldo, uba dang bteng ban pyni ïa ka jinglah jong u watla u la 41
snem ka rta. Ka Portugal ruh ka don ki rangïalehkai ba tbit kum u
Bruno Fernandes, Rafael Leão, Vitinha bad Bernardo Silva kiba lah
ban pynkylla ïa kano kano ka jingïalehkai.

Lada phai sha ka histori jong ka UEFA European Championship, ka
Spain ka dei ka ri kaba la rah 4 sien ïa ka Euro, kaba pynlong ïa ka
kum ka ri kaba jop bun eh ïa kane ka lympung. Ka Portugal pat ka la
rah shisien ïa ka Euro ha u snem 2016, haba ka la pynliem ïa France
ha ka Final.

Ha ka FIFA World Cup Qatar 2022, ka Spain ka la shah pynkhyllem
noh ha Morocco da ka penalty shootout ha ka Round of 16. Ka
Portugal pat ka la poi sha ka Quarter-final hynrei ka la shah rem da
Morocco 1-0 kol, kaba pynkut ïa ka jingangnud jong u Cristiano
Ronaldo ban rah ïa ka World Cup

.
Mynta ha ka World Cup 2026, kine ki ar tylli ki kynhun ki la wanphai
biang ban ïakhun. Kawei ka dei ka kynhun kaba dap da ki samla ba
tbit, katba kawei pat ka dei ka kynhun kaba jingïalam da uwei na ki
legend ba khraw tam ha ka histori jong ka football.