Ka All India Football Federation (AIFF) Executive Committee ka la pynlong ïa ka jingïalang ha Football House,Ha New Delhi, ha ka sngi Palei, 6 Nailar (August), 2026.

U President ka AIFF, Shri Kalyan Chaubey, u la long kum u nongïalam haka jingïalang. Kiwei kiba la wan jingïashim bynta ki kynthup ïa u Treasurer Mr Kipa Ajay, u Deputy Secretary General Mr M Satyanarayan, bad ki dkhot Mr Lalnghinglova Hmar, Mr Menla Ethenpa, Mr Mohan Lal, Mr Neibou Sekhose, Mr Syed Husnain Naqvi, Mr Syed Imtiaz Hussain, Mr Deepak Sharma, Ms Valanka Alemao, Mr Vijay Bali, Ms Thongam Tababi Devi, Mr Shabbir Ali, Mr Bhaichung Bhutia, bad Mr Climax Lawrence.

Kawei na ki rai ba kongsan tam ba la shim ha ka jingïalang ka long ban pynthikna ba ka India kan ïashim bynta ha kine ar tylli ki lympung jingïalehkai:

Ka jingïalehkai paralok pyrshah ïa ka Brazil, kaba la dep jop san sien ïa ka FIFA World Cup, kaban long ha Kolkata ha ka 3 tarik Risaw (October), 2026.

Ka FIFA ASEAN Cup kaban long ha Indonesia naduh ka 24 tarik Nailur (September) haduh ka 3 tarik Risaw (October), 2026.

Ka Executive Committee ka la ithuh ba kane ka jingïalehkai pyrshah ïa ka Brazil, kaban long ha ka por jong ka FIFA International Match Window, ka dei ka kabu kaba kyrpang ban ai ïa ki rangïalehkai ka India ïa ka jingïoh jinghikai bad jingïakynduh kaba kordor pyrshah ïa kawei na ki ri ba khlaiñ tam haka phutbol pyrthei.

Namarkata, ka AIFF kan pyntip paidbah sha ka FIFA ba ka India kan ïashim bynta ha kine ar tylli ki jingïakhun da kaba pynmih ar kynhun ki Player – kawei na ka bynta ka jingïalehkai pyrshah ïa ka Brazil bad kawei pat na ka bynta ka FIFA ASEAN Cup.

Ka Executive Committee ka la bishar ruh ïa ki jingpynkhreh na ka bynta ka samoi jingïalehkai Indian Super League (ISL) 2026–27, hadien ba la pdiang ïa ka rukom treikam thymmai kaba ailad ïa ki klob ban ïalam ïaka liang khaïi .

Ki dkhot ki la ïoh jingtip halor ka jingkiew shaphrang jong ki klob kiba ïashim bynta bad ka Federation ha ka jingpynkhreh ïa ki kam treikam na ka bynta ka samoi ban wan.

Ka AIFF ka la rai ruh ban ai por shuh shuh ïa ka Jamshedpur FC ban pyrkhat biang ïa ka rai jong ka, da kaba pynjlan ïa ka por haduh ka 12 tarik Nailar (August), 2026 namar baka ladep pynbna ba kan nym ia shim bynta ha la ISL 2026.