Saw ngut ki shipai , kynthup ia uwei u ophisar bad uwei u pulit, ki la iap ha ka jingiakynduh bad ki lehnoh kiba don ki tiar ialeh ha ka Doda district jong ka Jammu bad Kashmir ha ka sngi Nyngkong. Ïa katei ka jinghiar thma la kam da ki ‘Kashmir Tigers’, ka kynhun shadow jong ka kynhun lehnoh Jaish-e-Mohammad (JeM) kaba la kyrshan da ka Pakistan.

"U General Upendra Dwivedi, COAS, bad baroh ki kyrdan jong ka Indian Army ki la pynpaw ia ka jingsngewlem sha ki riew shlur u Captain Brijesh Thapa, u Naik D Rajesh, u Sepoy Bijendra bad u Sepoy Ajay Naruka, kiba la aiti ia la ka jingim ha ka kamram, ha ka por ba ki dang shimti ia ka jingkhynra ka jinglehnoh ha Doda khnang ban pynthikna ia ka jingsuk ha ka thain," la ong ka kyrwoh na ki shipai.

Kane ka jingïakynduh ka la jia ha ka por ba ki shipai jong ka Rashtriya Rifles and Special Operations Group (SOG) jong ki pulit ka Jammu and Kashmir ki la pynlong ïa ka jingker bad khynra lang ha Dhari Gote Urarbagi kaba don ha Desa forest belt kaba jngai kumba 55 km na ka sor Doda ha ka janmiet jong ka sngi Nyngkong.

Ki heh sorkar ki iathuh ba kane ka jingiasiat suloi ka la sdang hadien ba la pynlong ia ka kordon bad ka jingkhynra ha ka thain khlaw Desa ha ka por kumba 7.45 baje janmiet.

Ki bor pahara ki la mynsaw ha ka jingshah siat, kaba ha kaba sdang ka la neh palat 20 minit.Ia kiba mynsaw la pynkit noh sha hospital bad la iathuh ba ka jinglong jingman jong ki ka long kaba shitom, la ong ki heh sorkar ha ka sngi Nyngkong. Kane ka jingkhynra ka dang ïaid shakhmat namar ba la ngeit ba ar ne lai ngut ki lehnoh ki don kiba rieh ha katei ka jaka, ki la bynrap.

Katkum ka jingïathuh jong ka Army’s 16 Corps kaba la tip ruh kum ka White Knight Corps, ka jingïakynduh bad ki lehnoh ka la mih ha ka por kumba 9 baje mynstep ha kaba ka la mih ka jingther suloi kaba jur bha.Ki khubor ba nyngkong ki pyni ba ki la don ka jingmynsaw ha ki shlur jong ngi ong ka White Knight Corps ha ka Twitter.